Tag Archives: pilipino

Pambansang New Year’s Resolution

Malapit na malapit na ang Pasko at New Year.

Ilang araw na lang ay magpapaalam na ang 2012 at isang bagong taon muli ang ating sasalubungin. Bagong simula at ibayong pakikisabak sa mga dati at bagong challenges ng buhay.

Ang holiday season ay hindi lang panahon ng gastusan at pagkunsumo ng napakaraming calorie sa katawan. Panahon din ito ng pagpa-plano at pagre-recharge ng sarili. Kaya’t huwag kalimutan ang importanteng activity na ito. Huwag hayaang bumulaga ang bagong taon na hindi prepared.

Sa mga panahong ito ay maraming tao ang nagre-reflect sa lumipas na taon. Kung ano ang naging epekto ng kanilang mga desisyon sa kanilang kasalukuyang katayuan sa buhay.

Ako man ay nakiki-replek-replek na rin. Nais kong i-address yung mga partikular na isyung bumagabag sa aking personal na buhay nitong nakalipas na taon. Gusto kong gumawa ng mga tweaks sa ilang aspeto ng aking buhay ngayong bagong taon sa paghahangad na makaranas ng mga positibong pangyayari.

thinker
heto ako, nanigas na sa pag-iisip ng magandang new year’s resolution (ba’t wala akong salawal dito?)

Hindi gusto ng iba ang nagse-set ng New Year’s Resolution kasi nakaka-disappoint kapag hindi natupad. Pero para sa akin ay magandang bagay ang mag-set ng goal para sa sarili. At least may direksyon kang tinutungo. Hindi yung kahit ano na lang.

Malamang kasi na kapag kahit ano na lang ang pinuntirya eh kahit ano na lang din ang pwedeng mangyari.

Naisip ko lang (wow, nag-iisip ako 😀 ), kung ang isang indibidwal na nagnanais ng mabuting pagbabago para sa sarili ay nagse-set ng goal o new year’s resolution, ano kaya kung magkaroon din tayo ng isang Pambansang New Year’s Resolution taun-taon?

Kumbaga, bukod sa mga personal goals natin para sa sarili eh magse-set din tayo ng goals para maka-ambag sa new year’s resolution ng ating bansa.

Wild idea ba? Pero kapag nag-succeed iyon sa atin eh malamang gayahin din tayo ng ibang bansa. Trend setter ang dating natin. Mafi-feature na naman tayo sa CNN nito pag nagkataon 😀

new year's resolution
kapag nag-krus ba ng mga daliri ay nangangahulugan ito ng pagsisinungaling o kagustuhan na matupad ang hiling? ano ba talaga?

Ang isang magandang new-year’s resolution na magandang i-suggest ay ang puksain o bawasan ang kultura ng katiwalian sa buong Pilipinas.

Bale depende sa kung ano ang katayuan ng isang Pilipino sa kanyang buhay, may ise-set s’yang personal new year’s resolution na makaka-ambag sa taunang new year’s resolution ng bansa.

Heto ang halimbawa ng new year’s resolution na maaaring gawin ng iba’t ibang uri ng Pilipino. Mga bagay na malaki ang maitutulong sa pagsupil ng katiwalian.

  • Anak – pagkasyahin sa sarili ang allowance at hindi na susungkitin ang alkansya ni nanay
  • Nanay – maging tapat sa pag-audit ng gastusin sa bahay at huwag magtago ng pera na lingid sa kaalaman ni mister
  • Tatay – mag-declare ng tamang assets at liabilites kay misis
  • Estudyante – mag-ukol ng sapat na oras sa pag-aaral bago ang test at huwag mangopya sa eksamen
  • Teacher – humanap ng ibang sideline na hindi gumigipit sa mga estudyante at ihinto ang pangongomisyon sa mga school project
  • Empleyado – maghanap ng mabibiling murang toilet paper at huwag mag-uwi ng toilet paper galing sa opisina
  • Employer – sumunod sa sariling mga ipinapatupad na patakaran
  • Cashier – maging tapat sa trabaho at huwag magbulsa ng benta
  • Manager – maging tapat din sa trabaho at huwag din magbulsa ng benta
  • Business Owner – magpasweldo sa tamang oras at huwag utangan ng sweldo ang mga trabahador
  • Government Employee – magtrabaho’t umuwi sa tamang oras at huwag pakikipagkuwentuhan at pag-a-undertime ang inaatupag
  • Elected Government Official – sumunod sa mga batas ng Pamahalaang Pilipinas at huwag pumatay, huwag magnakaw, huwag tumira sa labas ng bayan kung saan naihalal at huwag magparami ng asawa’t anak

Kung pagpuksa din lang sa kultura ng corruption ang ating magiging Pambansang New Year’s Resolution eh maraming paraan tayong maiisip para makipag-cooperate dito.

Pagkatapos ng new year’s resolution na ito, maaaring mag-set ulit ang Pamahalaan ng iba namang bagong new year’s resolution sa susunod na taon. Iyon ding tumatalakay sa mga importanteng issue ng ating bansa (gaya ng kahirapan, kriminalidad, pag-abuso sa karapatang pantao, at iba pa). At least kahit paano, every year, one major issue at a time eh may naa-address tayo. Pwede rin naman na hanggang dalawang major issue ang sabay na magiging tema ng Pambansang New Year’s Resolution.

Hindi naman ibig sabihin nito na hindi na gagawin ng Pamahalaan ang iba nitong obligasyon. Kumbaga, paglalagakan ng concentrated effort na may kooperasyon ng mga mamamayan ang ise-set na goal bawat taon.

Wild idea at may pagka-out of this world siguro at siguradong maraming kokontra dito kapag isinuggest ito kahit sa Baranggay Hall lang.

Pero sa tingin ko eh kung nahihikayat ng Pamahalaan ang mga mamamayan na sumuporta sa mga proyekto nito (gaya halimbawa ng pag-promote ng turismo sa Pilipinas) eh mae-encourage din nitong mag-participate ang mga Pilipino sa pagsasakatuparan ng isang Pambansang New Year’s Resolution.

Happy holidays sa inyong lahat! Hindi pa po ito ang huling post ko this year 😀

Advertisements

Mga Bagay na Hindi ko Naiintindihan sa Pilipinas

Nung pinaplano ko pa lang gawin itong blog na ito ay medyo nag-alala ako na baka puro negative lang ang maisulat ko dito pero nagpapasalamat ako’t hindi nangyari iyon.

Pero dahil hindi masyadong maganda ang linggong ito para sa akin, nakapag-umpisa na akong mag-post ng negative na content (pagtataas ng Philhealth at pagnanakaw ng mga Pilipino sa isang Dutch tourist).

Naumpisahan ko na rin lang, sasamantalahin ko na ang pagkakataong ito para tapusin ang week na ito sa isa pang negative content na blog post.

————————————————————————————

Bagama’t isa akong Pilipinong lumaki at nabuhay sa Pilipinas ng maraming maraming taon, may mga bagay pa ring hindi ko talaga maintindihan tungkol sa Pilipinas.

Narito ang 10 mga bagay na hindi ko naiintindihan sa Pilipinas (in no particular order).

1. Bakit galit na galit ang mga militanteng aktibista?
Ano ang naitutulong sa mga Pilipino at sa Pilipinas ng pagsusunog nila ng effigy, ng nililikha nilang traffic at ikinakalat nilang basura sa kalsada? Binu-bully tayo ng Tsina pero bakit hindi sila nagsusunog ng bandera ng Tsina o kaya ng picture ni Mao Tse Tung?

2. Bakit yung mga sumusunod sa batas ang pinapahirapan?
Isang magandang idea parati ng mga ahensya ng gobyerno ang: dagdagan ang buwis ng mga empleyado, dagdagan ang binabayaran ng mga OFW, dagdagan ang bayaran ng mga kumukuha ng business permit, dagdagan ang bayad sa airport, etc.

Pero kung tama ba yung pagma-manage sa pera ng mga ahensyang ito eh hindi yata masyadong napag-aaralan. Gaya ng balitang ito: 250,000 OFWs deprived of Philhealth benefits

Lalo lang nitong ine-encourage ang mga tao na maghanap ng loophole at lumabag sa mga ipinapatupad na batas ng pamahalaan. Bakit ‘di muna nila ayusin yung umiiral na sistema bago magpataw ng bagong pagkakagastusan sa mga tao?

3. Bakit may mga nagbubuga pa rin ng maitim na usok na sasakyan?
Kahit merong mga smoke belching tests sa LTO, marami pa ring nagkalat na nagbubuga ng nakakalason na usok sa kalsada. Paano nakakapasa sa test ang mga sasakyang ito?

Tapos dadagdagan nila yung taon ng pag-aaral ng mga estudyante para daw maging competitive tayo. Eh linisin lang natin yung hangin natin eh baka mag-improve ang IQ nating lahat sa Pilipinas eh!

4. Bakit merong “For Registration” na plate number?
Kung yung mga plate number na ngang totoo eh napepeke, ‘yun pa kayang “For Registration”? Eh kahit sino kayang gumawa nun eh.

Hindi ba napakadaling makatakas ng kahit sinong nakagawa ng krimen kung “for registration” ang plate number ng gagamitin nilang sasakyan? Ipagbawal na dapat ang paggamit nito eh. Kung hindi pa registered ang sasakyan, hindi ito dapat gamitin sa kalsada.

5. Bakit gustung gusto nating ginagaya ang ibang bansa?
Yung palabas nila sa tv, yung pananamit nila, yung kanta nila etc., patok na patok sa atin at kinokopya pa natin. Mangongopya na rin lang tayo eh di kopyahin na rin natin yung mga ugali nilang nagiging dahilan ng pag-unlad ng bansa nila. Gaya ng pagsunod sa batas at mahigpit na pagpapatupad dito.

6. Bakit mayaman ang Intsik sa bansa natin?
Bakit si Henry Sy ang pinakamayamang tao sa Pilipinas at hindi si Manny Pangilinan? Bakit hindi Pilipino ang mayayaman sa Pilipinas? Filipino citizen na ba si Henry Sy? Pwede na rin ba tayong maging proud para sa kanya?

7. Bakit masyadong sensitive ang mga Pilipino?
Kahit alam nating may bahid ng katotohan, makikipag-away, makikipaglabasan ng baho, makikipag-debate tayo sa mga negative na sinasabi sa atin.

Pero kahit maipamukha natin sa ibang bansa na mas reject ang bansa nila, hindi nun nababago yung masamang kalagayan ng peace and order, ekonomiya, edukasyon, kalusugan, kalinisan, government service, at iba pa sa bansa natin. Nananatili pa rin yung katotohan na kailangan pa rin ng malawakang improvement sa bansa natin.

8. Bakit may mga problema ang bansa na hindi sinu-solusyunan?
20 years ago, binabaha na yung mga kalsada sa lugar namin. Hanggang ngayon, binabaha pa din! Kapag may buni ka ba sa balat, hahayaan mo lang ito mawala? Hindi ba gagamutin mo ito?

Pero bakit yung gun related violence, hoodlums in uniform, hazing, election violence, maruming inuming tubig, trahedya pag may bagyo, street children at child labor, tagas ng water pipes, sirang mga kalsada, illegal recruiters, mga napuputulan ng daliri ‘pag bagong taon, tinatamaan ng ligaw na bala, kidnapping, carnapping, inefficient garbage disposal system, etc., etc., etc., ay hindi pa rin nagagawan ng pangmatagalang solusyon?

Mga sakit ng lipunan ito na hindi ginagamot.

9. Bakit nagkalat ang mga baril sa isang bansang marami ang nagugutom?
Sa’n nakakakuha ng baril ang mga criminal elements ng lipunan natin? Mas madali na lang ba talaga makakuha ng baril at bala ngayon kesa makahanap ng marangal na trabaho?

10. Bakit may mga Pilipinong galit kunyari sa mga telenovela?
Mumurahin pa nila at lalait-laitin ang mga writer at artista ng telenovela. Isusumpa nila sa kaitaas-taasang langit ang telenovela pero maaasahan mong araw-araw pa rin nila itong susundan at hindi palalagpasin para malaman kung ano ang mga susunod na pangyayari.

Nakaka-high blood. Pwede ba akong sumigaw?

sigaw ng galit

Okay na ‘ko…meron pa pala.

11. Bakit may mga Pilipinong hindi nagre-reklamo sa awtoridad?
Magrereklamo sila sa mga kaanak nila, kaibigan nila, sa mga ka-text nila, mga ka-facebook nila o kaya sa…blog nila! Pero hindi sila magrereklamo dun sa mga merong pwedeng magawa. Hay naku!

Believe It or Not: Eco-friendly ang Pinoy (Part 2/2)

Hindi naman sa dini-discourage ko ang pamumulot ng mga bagay na pwede pang gamitin. Wala namang batas laban dun at nakakatulong pa nga ito sa pagbabawas ng basura.

Nakaka-tipid din ang Pilipinong nasa ibang bansa dahil hindi na n’ya kelangan bumili ng bagong gamit.  Naipapadala n’ya sa Pilipinas yung perang gagamitin sana pambili ng bagong gamit (‘wag lang sana bulagsak sa pera ang kaanak na padadalhan ng pera sa Pilipinas.)

Kaya lang sa tingin ko, dapat maging maingat ang sinumang Pilipino na gustong magtangka na pumulot ng mga recyclable na gamit sa ibang bansa. Nagiging dahilan ito para sa mga banyaga na tingnan ng mababa ang mga Pilipino.

Gaya ng comment ko tungkol dun sa pananaw ng isang Singaporean sa mga Pilipino, kahit na ano pa ang lahi mo: Filipino, Indonesian, Chinese, Indian, American, etc., dapat mag-ingat sa kung anong impression ang ibinibigay natin sa mga hindi natin kalahi. Kasi (bagamat hindi tama) nahuhusgahan ang buong bansa dahil sa mga ikinikilos ng ilan sa mga mamamayan nito.

Sa ayaw man o sa gusto natin, kapag nagpunta tayo sa ibang bansa, nagiging official representative tayo ng lupang ating sinilangan.

Kung kaya kahit na may magandang benefits sa ating environment at nakakatulong sa pagtitipid, hinding hindi at never talaga ako namumulot ng basura sa bansang kinaroroonan ko.

Maliban lang dun sa isang pagkakataon na may nakita akong isang bunton ng Samurai X comics sa labas ng apartment namin. Luma na pero malinis, walang punit at ang gaganda ng drawing. Hayun ang picture nila sa taas ng post na ito. Sayang din yun ah.

Related Post: Pananaw ng Isang Singaporean sa Pilipinas

Believe It or Not: Eco-friendly ang Pinoy (Part 1/2)

Isang mabuting katangian ng Pilipino na maipagmamalaki ko ay ang ugali nating hindi
nagtatapon ng basura basta-basta. Oo nga at maraming nagtatapon ng basura kung saan-saan lalo na sa mga bawal pagtapunan ng basura. Ito ang nagiging dahilan ng pagbaha at pagkalat ng kung anu-anong sakit. Pero ang ibig kong sabihin ay yung hindi tayo nagtatapon agad ng mga bagay.

Sa bahay lang ng mga magulang ko ay napakaraming damit, mga kahon, drawer, timba,
libro, appliances, magazine at kung anu-ano pang mga hindi ginagamit pero hindi pa rin itinatapon.

Marami akong alam na mga tahanang ganito sa Pilipinas. Hangga’t hindi pa tuluyang gutay-gutay at walang wala na talagang silbi ang isang bagay ay hindi ito itinatapon ng maraming Pilipino.

Magandang bagay ito sa tingin ko kumpara sa ugali ng mga banyagang kahit pwede pang
gamitin ang isang bagay ay itatapon na dahil napagsawaan na, nagkaroon ng konting diperensya o wala na sa uso. Magtatapon sila ng refrigerator, washing machine, colored tv, kotse, computer at kung anu-ano pa, kahit pwede pa itong magamit.

Mabuti na lang ang mga Pilipino, kahit saang bansa sila magpunta ay nadadala ang ugali ng
pagre-recycle sa mga gamit. Hindi tayo nagdadagdag ng basura sa ibang bansa, minsan pa nga eh nagbabawas pa.

Minsang ako ay naghihintay ng sakay pauwi sa Pilipinas, naulinigan ko ang dalawang Pilipinong nag-uusap at parang nagpapayabangan tungkol sa mga magagandang bagay na napulot nila sa Japan. Yung isa eh may mga napulot na magagandang pigurin, yung isa naman eh may mga napulot na magagandang electronic appliances gaya ng stereo. ( Ang totoo n’yan, nalimutan ko na kung yun nga ang mga napulot nila pero naaalala ko na nagpayabangan sila sa napulot nila.)

May mga alam din akong ibang Pilipino na nakakakuha minsan ng cd player, bisekleta, microwave oven, keyboard at kung anu-ano pa sa basura.

Pero ako, ayoko mamulot ng basurang pwede ko pang magamit. Nagnais ako dati at nagtangka na din ako (sa kalaliman ng gabi) pero hindi ko pa nagawang isakatuparan ang pamumulot ng basurang pwede pang gamitin.

Naiisip ko, ano na lang ang iisipin ng mga banyaga kapag nalaman nilang namumulot ng basura nila ang mga Pilipino?

(Itutuloy…)

Pananaw ng Isang Singaporean sa Pilipinas

Salamat kay Shuniegirl sa pagtimbre sa akin ng statement galing sa diumano’y isang Singaporean na binabatikos ang mga Pilipino.

Narito ang ilang excerpt mula sa Filipino bashing statement:

My observation of pinoys here in Singapore is not favourable either. I have seen maids abusing little children by literally dragging the tiny tots while yakking on the phone, infesting the shopping centres with their irritating English slang and tagalog which sounded more like chickens and ducks talking. They are supeficial people in the corporate world, smiling fakely but with a dagger behind – just look at their politicians and political culture which affirm this culturally imbibed trait.

Heto ang link sa buong mensahe: A Singaporean’s Observation of Filipinos

Una sa lahat, hindi tayo sigurado sa background ng mensaheng ito. Hindi rin natin alam kung totoong Singaporean ang sumulat nito. For all we know, baka isang Pilipino troll na galit sa kapwa Pilipino ang gumawa nito. We can never be sure.

Subalit kagaya ng ibang mga nakalipas na umikot na negative statements tungkol sa Pilipinas, naglalaman ito ng mga sumusunod:

1. Over Generalization – “lahat ng Pilipino sa buong Pilipinas ay pareho”
2. Puno ng galit – gumagamit ng mga derogative na pantukoy sa mga Pilipino
3. Naka-focus sa negative – “wala ng ginawang tama ang mga Pilipino”

Sa ganitong mga puna sa atin, pwede nating sabihin na, “To hell with them!
Mamatay sila sa kunsumisyon!” at magpatuloy lang tayo sa kani-kaniya nating gawain.

Pero para sa akin, bilang mga sibilisadong tao, mabuti yatang i-consider muna natin ang mga sumusunod na bagay bago tayo maging bayolente sa mga taong ito:

1. Tingnan natin kung may katotohanan ang sinabi
Kung may bahid ito ng katotohanan, may magagawa tayong pagbabago sa kani-kaniyang
bakuran ng impluwensya natin para matanggal ang masamang imahe sa atin.

2. Gusto man o hindi, ang bawat isa sa atin ay representative ng bansa natin
Kung ang kauna-unahang foreigner na makilala natin ay barumbado, maiisip natin na
lahat ng tao sa bansa n’ya ay barumbado din.

Kung paano din natin pakitunguhan ang mga dayuhan ang nagiging basehan nila para
husgahan ang buong lahi natin. At sa dahilan ding ito ay…

3. ‘Wag natin sumpain ang bansa ng dayuhang masama ang opinyon sa atin
Hindi natin mapipigilan ang mga banyaga na magsalita ng hindi maganda tungkol sa atin. Hindi naman ibig sabihin nu’n na lahat ng mga banyaga ay may ganitong opinyon tungkol sa mga Pilipino at sa Pilipinas.

Ang magandang magagawa natin ay i-blacklist sa immigration ang partikular na dayuhang galit sa Pilipinas, kung matutukoy ang identity ng dayuhang ito. Tapos ay pag-ibayuhin pa natin ang pagpapaunlad sa ating bansa. Hayaan nating ma-torture ang banyagang iyon sa katotohanang hindi na s’ya makakabalik pa sa ating bansa kahit kelan. Ah, the sweet taste of revenge.

KM3:TINIG (Ibuwal ang mga Pader)

*****************************************************************************
Ipinapauna ko ang paghingi ng paumanhin sa pagiging napaka-Tagalog ko sa sulating ito.
Mangyari kasi’y walang pangingiming inilahok ko ang aking sarili sa patimpalak ng Kainaman kung saan si JKulisap ang may pasimuno.
*****************************************************************************

Mahalagang bagay ang maibahagi ang nilalaman ng ating isip sa mga taong naka-paligid sa atin. Pinapatatag nito ang ugnayan natin sa ating kapwa-tao at nagbibigay sa atin ng mga kaaya-ayang karanasan.

Maraming paraan para maibahagi ang saloobin natin at isang mabisang paraan ay ang paggamit ng ating tinig. Sabi nga nila, “H’wag kang parang tuod, magsalita ka!”.

Sa isang pangkaraniwang tao na walang kapansanan sa pag-iisip, ang pakikibagay at pagsasanay sa sarili sa bagong kapaligiran ay hindi nangangailangan ng napakatagal na panahon. Sapat na ang ilang linggong patuloy na pakikipag-ugnayan sa bagong paligid na kinasadlakan.

Paano naman kung mapasadlak sa isang kapaligiran na may ibang kultura, ibang wika at ibang pamamaraan? Gumulat ang mga ito sa akin nang una akong dumating sa bansang Hapon.

Karamihan sa mga Hapon na aking nakilala ay unang beses pa lamang maka-salamuha ng Pilipino. Subalit nararamdaman ko na mayroon na silang pananaw kung ano ang mga Pilipino ayon sa mga hindi mabuting balita o kuwentong narinig na nila tungkol sa Pilipinas.

Karamihan sa kanila ay hindi nakakapag-Inggles at lalo namang hindi nakakapag-salita ng
Tagalog. Ako naman ay hindi marunong mag-Hapon ng mga panahong iyon.

Gumugol ako ng halos dalawang taon upang matutunan ang kanilang salita, sulat, kultura at pananaw. Nagbigay ito sa akin ng lakas ng loob humarap sa mga Hapon. Hindi man perpekto, nagkaroon ako ng sapat na kakayahan upang makabuo ng makabuluhang relasyon sa ilang mga Hapon na nasa aking paligid.

Naibahagi ko rin sa kanila ang mga mabuting bagay tungkol sa Pilipinas na hindi nila malalaman sa panonood lamang ng mga balita tungkol sa ating bansa.

Kagaya ng mga nakalipas kong isinulat, ang pagsisikap upang lagpasan ang mga hadlang sa ating pag-unlad ay isang kakayahang natututunan.

Nang magawa kong iparinig ang aking tinig sa salitang nauunawaan ng mga Hapon, ibinuwal nito ang mga pader ng hindi pagkakaintindihan at lumikha ng tulay sa pagtatagpo ng magkaibang kultura.

Preamble of 1987 Constitution

Ito ang panimula ng kasalukuyang Konstitusyon ng ating bansa. Para bang panata para sa ating Konstitusyon.

Tagalog

Kami, ang nakapangyayaring sambayanang Pilipino, na humihingi ng tulong sa Makapangyarihang Diyos, upang bumuo ng isang makatarungan at makataong lipunan at magtatag ng isang Pamahalaan nakakatawan sa aming mga mithiin at mga lunggatiin, magtataguyod ng kabutihan sa bawat isa, mangangalaga at magpapaunlad ng aming kamanahan, at titiyak para saming sarili at angkanang susunod ng mga biyaya ng kalayaan at demokrasya sa ilalim ng pananaig ng batas at ng pamamahalang puspos ng katotohanan, katarungan, kalayaan, pag-ibig, pagkakapantay-pantay at kapayapaan, ay naglalagda at naghahayag ng Konstitusyong ito.

English

We, the sovereign Filipino people, imploring the aid of Almighty God, in order to build a just and humane society and establish a Government that shall embody our ideals and aspirations, promote the common good, conserve and develop our patrimony, and secure to ourselves and our posterity the blessings of independence and democracy under the rule of law and a regime of truth, justice, freedom, love, equality, and peace, do ordain and promulgate this Constitution.

Republic of the Philippines 1987 Constitution Link:
Tagalog dito
English here