Tag Archives: mga pag-iingat na dapat gawin

Mga Palatandaang May Mga Mandurukot Sa Loob ng Sinasakyang Bus

Narito po ang isang very timely at kapaki-pakinabang na guest post upang makapag-ingat tayo sa mga mandurukot.

magnanakaw

Mga Palatandaang May Mga Mandurukot Sa Loob ng Sinasakyang Bus

ni Mamang Enhinyero

Tulad ng karamihang Juan ay isa ako sa mga umaasa sa mga bus na syang totoong hari ng kalsada (na minsan ay aakalain mong paga-ari nga nila ang EDSA). May ilang beses na rin akong nakakita ng mga bugok na mga mandurukot sa loob mismo ng bus at minsan na rin akong naipit ng mga kampon ni Mang Taning habang bumababa ako at natangay ang nakabulsa kong cellphone.

Kelangan talaga mag-ingat lalo na sa mga pampublikong transportasyon gaya sa loob ng bus. Dapat di ka sitting duck o easy prey. Pero paano mo ba sila makikilala at paano mo malalaman ang mga galawang pangkawatan nang ikaw mismo ay hindi kinakailangang maging mandurukot (eto e kung naniniwala ka sa kasabihang it takes one to know one)?

1. Merong siksikan sa may malapit sa pinto kahit di puno ang center isle.

Ang lehitimong pasahero ay ayaw na ayaw masiksik lalo na kung maluwag pa ang sinasakyang bus. Pinipili ng mga mandurukot ang malapit sa pinto para makalabas at makatakbo kaagad kapag nagkaipitan. Kung kaya very prone madukutan ang mga nasa malapit sa pinto gaya ng ibang mga pasahero na kahit Ayala pa bababa at kakasakay lang sa Quezon Ave. e gustong nasa may pintuan pa rin. Madalas sa mga ganito e mga babae at mga matatanda.

2. Nanlilisik ang mga mata, di mapakali, at lilinga-linga kahit napaka-ordinaryo ng sitwasyon.

Dito ay kailangan mo ng baseline para ma-detect mo ang mga galawang out of the ordinary. Kailangan mong maging mapagmatyag at maka-establish ng baseline behavior. Di mo kelangang maka-graduate ng psychology, kelangan mo lang magmasid.

3. May dalawa o higit pang mga taong biglang sumakay na may kahinahinalang kilos.

Madalang rumaket mag-isa ang mga mandurukot. Ulit, kailangan mong maging pamilyar sa mga out of the ordinary na mga kilos para mapansin mo sila.

4. Magkakalayo sila ng pwesto sa bus, malalakas mag-usap ng mabilis at hindi maintindihan (not necessarily ibang dialect, alam mong tagalog pero magtataka ka kung bakit di mo maintindihan).

Ang lehitimong pasahero malapit sa kausap, at madalas ay walang pakialam sa iba kahit marinig ang pinag-uusapan.

5. Di nagbabayad ng pamasahe kahit nasa harapan na nila ang kunduktor.

Nasaksihan ko ito ng personal habang sinusulat ko ito sa loob ng bus gamit ang lapis at notebook. Magkakalayo sila noon na nakaupo mga 3 katao. Nang naniningil na ang kunduktor sa harap ng isa sa kanila ay nagsalita ang kasama nya ng hindi maintindihan at sabay-sabay nagsibabaan. “Mga mandurukot yun a,” nasabi nalang ng kunduktor.

6. Iba makatingin sa gamit ng ibang pasahero, lalo sa bag at cellphone.

Iba yung nakatingin lang sa tingin ng taong may maitim na balak at budhi. Nasa East Avenue ako noon. May suot akong relo at kitang-kita ko ang pagtitig ng isa sa kanila sa suot ko. Buti nalang di niya tinangkang agawin. Mga 5-7 katao sila na sabay sabay bumaba nang hindi nagbabayad. Yung isa ay nakita ko pang namulot ng ticket.

7. Kapag nakatayo ka, binabangga ka kahit siksikan, ayaw kang padaanin ng mga nasa harap mo kapag bababa ka na.

Eto na yung aktwal na pandurukot. Naranasan ko ito nung pababa na ako ng bus sa may Espanya. Di talaga ako pinababa hanggang hindi nakuha yung cellphone na nasa bulsa ko. Buti nalang at lumang-luma yung cellphone at buti nalang at hindi nakuha yung sampung libo na nasa secret pocket ko. Pero syempre nakakasama parin ng loob na bukod sa nadukutan ako e nawala ng isang iglap yung mga contacts ko.

Naglipana sila kahit saan. Kung paano sila uubusin ay tanging new world order lang ang makakagawa nyan. The least na pwede mong gawin e wag kang maging biktima. Pero paano ka nga ba makakaiwas?

  1. Wag magbubulsa ng wallet. Although hindi na ata uso to ngayon. Wag ilagay ang mga importanteng dokumento gaya ng ID, ATM at iba pa sa wallet sabay lagay sa likod na bulsa.
  2. Tanggalin ang relo at hikaw pati singsing dahil para kang naglagay ng karatula sa noo mo na may nakasulat na “COME ON BEBE, ROB ME, ROB ME!!!”
  3. I-bag ang cellphone (UTANG NA LOOB!!!). Etong di ko maintindihan sa karamihan. Yung iba di bale nang di kumapit sa mga hawakan at mabangasan ang mukha kapag natumba sa loob ng humaharurut na bus basta nakahawak lang sa cellphone. BAKIT???!!!
  4. Alisin ang mga temptation. Kung chic ka (o kahit hindi) at magpakita ka ng legs o cleavage e siguradong titignan at titignan yan parehas ng mga manyakis at mga hindi. Ganyan din sa cellphone at iba pang mamahaling gadgets at gamit. Simple logic.
  5. Magmasid ka. Tigilan mo yung cellphone, tanggalin ang headset at itago mo muna yung libro. Alalahanin mong life skill ang maalam sa tinatawag na situational awareness.

*****************************************************************

Mamang Enhinyero

Isang enhinyerong nasa CBD na madalas nakatingin sa malayo kapag naglalakad dahil palaging may iniisip; madaling maagaw ang atensyon habang naglalakad sa Ayala Avenue dahil sa mga chics; isang mamang nakasakay sa ordinary o aircon bus at makikitang nagsusulat kahit umaandar ito o di kaya’y dinudutdut ang kanyang latest, state-of-the-art cellphone na Samsung Metro 312 bilang kanyang digital notebook; INFJ.

Advertisements

Mga Importanteng Paalala sa Paghahanap ng Trabaho sa UAE

united arab emirates

Sobrang dami ng mga Pinoy sa UAE ngayon na naka-Tourist Visa at naghahanap ng trabaho.

At sa sobrang hirap makahanap ng trabaho dahil sa tindi ng kompetisyon, marami sa ating mga kababayan ang kumakagat sa kahit anong offer. Marami ang naniniwala sa mga matatamis na pangako ng mga employer na bandang huli ay hindi naisa-sakatuparan.

May dalawang bagay na dapat niyong pag-ingatan kung kayo ay kasalukuyang nasa UAE at nakikipag-sapalaran. Hindi dapat kagat lang ng kagat sa kung ano ang io-offer dahil mapapaso na ang Tourist Visa niyo.

Sobrang babang pasweldo.

Dahil alam ng mga employers na sobrang hirap maghanap ng trabaho, sinasamantala nila ito. Alam nilang papayag sa kahit magkano na lang ang mga Pinoy wag lang hindi makahanap ng trabaho.

Maraming mga Pinoy ang pumipirma sa kontrata kahit AED 1,800 lang ang sweldo kasama na lahat-lahat dahil sa takot na hindi na makatanggap pa ng ibang offer. (Note: AED 1 is about 13 Php as of Jan. 2016)

Pinakamura na ang AED 650 na bedspace dito sa UAE. Mamamasahe ka pa at siyempre kakain at magpapadala. Ano’ng mapapala mo kung tatanggapin mo ang ganyan kababang offer lalo pa’t patuloy ang pagtaas ng cost of living sa UAE at bali-balita’y magkakaroon na rin daw ng VAT sa hindi malayong hinaharap?

Mga kumpanyang manggagamit pero hindi ka iha-hire.

May tinatawag na short-term at long-term na Tourist Visa dito sa Dubai.

  • Short-term Visa = 1 Month Validity
  • Long-term Visa = 3 Months Validity

Maraming kumukuha ng long-term visa dahil alam nilang hindi sila agad makakakuha ng trabaho sa loob lamang ng isang buwan.

Pero may mag siniswerte rin na kahit isang buwan pa lang silang nakikipagsapalaran ay nakakakuha agad sila ng trabaho. Ang problema, hindi lahat ng offer ay totoo.

May mga kumpanyang sasabihin sa iyo na mag-training ka muna o magkaroon muna kayo ng trial para makita nila kung magaling ka nga talaga at kung magugustuhan ka nila. Pag sinabi nilang 3 days trial, fair enough. Pero pag sinabihan ka na two weeks ang trial mo, kesyo may sweldo iyan o wala, magduda ka na.

Maraming mga naniwala at pumasok ng dalawang linggo na trial at matapos ang lahat ng kaniyang paghihirap ay sinabihan ng employer na hindi siya kukunin dahil hindi daw siya pasado sa kanilang standards. Dalawang linggo ang nawala sa kaniya na sana ay nagamit niya sa paghahanap ng ibang trabaho.

May kumpanya naman na sasabihan kang saka na lang daw ipo-process ang visa mo. Kapag malapit na mapaso ang current Tourist Visa mo. Kesyo sayang naman daw. Papapasukin ka nila kahit wala ka pang work permit (at bawal ito) at maswerte kung makakatanggap ng sweldo. Yung iba, sinasabihang saka lang sila makakasweldo kapag may visa na sila. Pero wala kang habol dito. Dahil wala kang work permit o visa ay hindi ka maaaring lumapit sa Labor para magreklamo at kayang-kaya ka nilang itanggi.

Sa kasamaang palad, yung iba, hindi na nga nakatanggap ng sweldo, napaso pa ang visa at bandang huli ay hindi rin na-visahan ng employer.

Kaya po para sa mga kababayan nating nasa UAE na kasalukuyang naghahanap ng trabaho, pakatandaan na:

  1. Huwag papayag sa sweldong ibinibigay kung alam niyong hindi makatarungan
  2. Huwag papayag na gamitin ng kumpanya ang inyong Tourist visa. Siguraduhing may work permit o visa bago ka pumasok; o kahit man lang umpisahan na ang pag-process dito.
  3. Huwag papasok hangga’t wala pa kayong napipirmahang offer letter o kontrata. Kailangang may pirma ng HR Manager o kahit sinong Manager ang offer letter niyo at kailangan may kopya kayo.

Maging wise po tayo sa pagtanggap ng trabaho. Oo, mahirap maghanap ng trabaho pero mas mahirap ang pumasok sa trabahong habang panahon mong pagdudusahan.

‘Wag Lang ‘Di Makapag-Rebelde

Naaalala mo pa ba ang kabataan mo?
Parang ang sarap mag-rebelde noon, ‘di ba?
‘Yun bang ipapakita mong iba ka sa lahat, hindi ka sumusunod sa kalakaran.
Proud ka pa minsan ‘pag alam mong hindi normal ang ginagawa mo.
Kakaiba ka.

Pangkaraniwan lang siguro sa paglaki ang damdaming mag-rebelde.
(‘Wag lang aabot sa puntong gusto mo na maging NPA o makipaghabulan sa mga pulis)

Kagaya ng munting ibon na tumatalon mula sa mataas na pugad para matutong lumipad.
O gaya ng batang tigre na humaharap sa dambuhalang elepante para matutong lumaban.
Tayo mang tao ay sinusukat ang sarili nating kapasidad.

Sinusuong natin ang mga sitwasyong hindi natin alam ang kalalabasan.
Tinatahak natin ang mga kalsadang hindi alam kung ano ang patutunguhan.
At minsan pa nga ginagawa natin ito kontra sa abiso ng mga nakatatanda.
Nung mga mas marami na ang nalalaman sa buhay.

accreditation
isang editorial cartoon na ginawa ko noon tungkol sa pagtatakip ng flaws ng aming eskwelahan para lang tumaas ang rating nito sa school accreditation…

Ang pagre-rebelde ay may dala-dalang hindi mabuting kahulugan.
Subalit ang pagre-rebelde ay isang paraan para kilalanin ang sarili.
Para malaman kung ano ang iyong personal preferences sa buhay.
Para malaman mo kung ano ang kaya mo at hindi.
Dapat yata talaga nating daanan ito para matuklasan ang ating personal identity.

Iba-iba din ang paraan natin sa pagiging rebelde.
Para sa akin, isang paraan ay ang pagtaliwas sa pangkaraniwan.

Pero ano na nga ba ang pangkaraniwan?
Sa dami ng kabaliwang ginagawa ng mga tao sa panahong ito,
ang hirap na yata maintindihan kung ano ang “pangkaraniwan”.

Pero kung kokontra ako sa gawi o kaugalian ng mga tao sa aking paligid,
iyon ay isang paraan ng pagre-rebelde para sa akin.

Kaya kung maraming kalalakihan ang umiihi sa pader,
rebelde ako kung iihi lang ako sa banyo.

ghostfighter
isang strip na ginawa ko noon gamit ang mga karakter ng ghostfighter…pinapatamaan nito ang scripted na isasagot ng mga isu-survey na estudyante para sa school accreditation

Iba’t iba ang pagpapahayag natin ng pagiging rebelde.

Merong cute
– mga kakaibang kolorete sa daliri
– paglalagay ng kakaibang mga keychain sa bag o celphone
– kakaibang kasuotan

Merong agaw-pansin
– kulay orange na buhok
– mga tingga sa mukha
– tattoo

Meron ding mga patago, mga pasaway, mga delikado at yung iba ay nasa
level na ng pagiging salot at peste ng lipunan.

teachers meeting
isang strip na bina-blind item ang isang teacher na naningil ng mahal sa mga handout photocopies

Pero madalas ay magastos maging kakaiba.
Kailangan ng pera para mai-express ang personal na rebelyon.

Nung college ako, dahil mahirap lang kami, dinaan ko lang sa mga drawing ang pagiging rebelde ko.

Kasama sa post na ito ang ilang mga drawing ko para sa school publication namin noon.
Tinutuligsa ko sa mga drawing na ito ang mga napansin kong mali sa aming paaralan.

Walang pinatawad, mula school administration, teachers, guards hanggang kapwa estudyante ay tinuligsa.

Yung iba na-publish, yung iba hindi.
Mabuti na lang at hindi ako napahamak sa mga drawing na ito.
Natakot siguro ang editor in chief ng aming school magazine na ilabas ang iba sa mga ito.

Hindi hamak na perwisyo sa akin at sa aking mga magulang kung sakaling na-kick out at na-blacklist ako sa ibang eskwelahan dahil sa mga drawing na ito.

Hindi ko agad naisip ang mga bagay na iyon nung panahong ginawa ko ang mga ito.

school guards
pamumuna sa walang habas na tuition fee increase at sobrang higpit na mga guard na pati paglakad sa loob ng campus, sinisita…bawal ang jaywalking sa loob ng campus noon

Sa pagre-rebeldeng ginawa ko, meron bang nabago?
Hindi ko alam…

Meron ba akong naimpluwensyahan?
Hindi ko rin alam…

Pero sa pamamagitan nito, nalaman ko ang mga hangganan na dapat kong itakda para sa aking sarili. Para sa sarili kong kapakanan at kapakanan ng mga umaasa sa akin.

student council
pagpuna sa maagang pagkatuto ng mga estudyante sa dirty politics…

Sa mga feeling cool sa pagre-rebelde at nagsisimula pa lamang tuklasin ang tunay na sarili,
hayaan n’yong ibahagi ko ang mga tips na ito:

1. Huwag ilagay ang sariling buhay at/o kinabukasan sa peligro
2. Gayundin, huwag ilagay ang buhay at/o kinabukasan ng ibang tao sa peligro
3. Irespeto ang karapatan ng iba (lahat tayo may feelings)
4. Sumunod sa batas (huwag maging salot ng lipunan!)
5. Panindigan ang mga resulta ng sariling desisyon

Ang pagtaliwas sa karaniwan ay hindi nangangahulugan na sisirain mo na ang buhay mo.
Puwede kang mag-rebelde na nananatili pa rin sa tama, konting creativity lang ang kailangan.

puppet student
feeling ko noon, kumakain ng pera ang school admin namin at meron silang mga alagang estudyante na sunud-sunuran sa kanila…

Maligayang pagre-rebelde (pagtuklas ng sarili) sa inyong lahat.