Tag Archives: henry sy

Ganito Dapat ang Mall

Hungkag.
Walang kabuluhan.
Tigib ng siphayo at pighati.

Ganyan ang buhay kapag nawala ang mga mall sa Pilipinas. Saan na lang pupulutin si Henry Sy kung hindi naimbento ang mall?

At dahil mall ang pambansang tambayan ng Pinoy, narito ang mga upgrades na siguradong magpapasaya sa maraming Pilipinong suki ng mga mall.

SM_North_Edsa
SM North Edsa: Isa sa mga pinakamalaking mall sa buong daigdig (walang biro)

1. Libreng shuttle bus.
Nung uso pa ang mga Duty Free Malls sa Clark, Pampanga, merong mga free bus na bumibyahe mula sa Main Entrance ng Clark hanggang sa mga Duty Free Malls.

Pwedeng magtalaga ng free shuttle bus terminals ang mga mall 5 to 10 kilometers ang layo mula sa mall. Siguradong hahakot ito ng mga customer para sa kanila. Syempre tipid naman sa pamasahe ang mga parokyano.

2. Metal detecting doors para sa entrance (kagaya sa entrance ng mga airport)
Napakadali magpasok o maglabas ng mga armas sa loob ng mall. Tuwing may katatapos lang na disgrasya sila naghihigpit sa inspection sa entrance pero after 2 to 3 weeks lang eh katatamaran na naman ang inspection.

Para hindi na katamaran at patuloy pa rin ang inspection eh lagyan na lang dapat ng metal detecting doors ang mga entrance ng mall.

3. Maraming mauupuan para pagpahingahan
Nakakapagod ang maglakad ng matagal sa mall lalo na kung babae ang kasama mo. Kaya dapat lang na merong mga upuan sa loob ng mall para makapagpahinga yung mga customer habang nag-iisip kung ano ang magandang bilhin.

4. Libreng playground sa loob
Hindi ba okay sana kung hindi pabili ng pabili ng kung anu-ano ang ating mga anak dahil busy silang naglalaro sa playground habang tayo eh nagpapahinga at minamasdan sila? Pwedeng excuse ito sa mga tatay para huwag samahan ang nanay sa pagwi-window shopping.

Kapag family friendly ang mall, mas maraming pamilya ang mamamasyal dito.

5. Libreng stroller o push cart pambata
Ang mahal ng arkila sa mga stroller sa mall, umaabot yata ng 60 pesos kada oras. Dapat I-abolish na ang sistemang ito. Kasi hindi naman lahat kayang magbayad ng ganitong halaga para sa mga stroller kaya umuuwi na lang agad ang mga magulang na may bitbit na bata at pagod nang maglakad.

Hindi rin naman kasi lahat ay nagma-may-ari ng stroller at may sasakyan para dalhin ito sa mall. Kung may libreng stroller, mas matagal makakapag-malling ang mga magulang.

6. Baby room para sa mga nursing mothers
Para naman sa mga may bitbit na baby, dapat sana may lugar para sa mga kananayan o katatayan para asikasuhin ang kanilang little darling angel. Duon eh pwedeng magtimpla ng milk, magpadede o palitan ng diaper si baby.

7. Libreng wheelchair para sa mga elderly
Sayang din ang kikitain ng mga mall kung ini-neglect nila ang mga senior citizens. Kung may stroller ang mga batang napapagod sa paglalakad, dapat lang na may wheelchair din para sa mga senior citizen customers na hindi naman kaya ang maghapong pagwi-window shopping, este, pamimili pala.

8. Government agency offices (LTO, SSS, DFA, NBI, NSO, POEA, PhilHealth etc.)
Itambak na lang sana nila yung mga government offices sa mga mall para mas marami pang maging customer ang mga malls. Eh di habang naghihintay ang mga naglalakad ng papeles eh nakakapag-relax sila sa isang fastfood habang nanginginain ng piniritong patatas.

9. Medical Clinic sa loob ng mall
Paano kapag inatake sa puso ang isang customer sa loob ng mall o kaya ay merong biglang nag-tumbling sa escalator at nabagok ang ulo? Kung hihintayin pa s’yang madala sa ospital eh baka huli na ang lahat.

Dapat lang na merong clinic sa loob ng mall para sa ganitong mga emergency cases na kelangan magbigay ng first aid habang hinihintay ang ambulansya, o dyip, o tricycle na maghahatid sa ospital.

10. Libreng maiinom na tubig
Ang gastos kaya ng bumili ng bumili ng mineral water. Kung may libreng inumin na maiinom sa mall, pihadong mas dadagsa ang mga tao sa food court at imbes na ibili ng mineral water ang pera eh makakabili na rin ng makakain.

Sa mga nagbabalak magpatayo ng mall d’yan, hayan may idea na kayo para maka-angat sa ibang mga mall.

Advertisements

Mga Bagay na Hindi ko Naiintindihan sa Pilipinas

Nung pinaplano ko pa lang gawin itong blog na ito ay medyo nag-alala ako na baka puro negative lang ang maisulat ko dito pero nagpapasalamat ako’t hindi nangyari iyon.

Pero dahil hindi masyadong maganda ang linggong ito para sa akin, nakapag-umpisa na akong mag-post ng negative na content (pagtataas ng Philhealth at pagnanakaw ng mga Pilipino sa isang Dutch tourist).

Naumpisahan ko na rin lang, sasamantalahin ko na ang pagkakataong ito para tapusin ang week na ito sa isa pang negative content na blog post.

————————————————————————————

Bagama’t isa akong Pilipinong lumaki at nabuhay sa Pilipinas ng maraming maraming taon, may mga bagay pa ring hindi ko talaga maintindihan tungkol sa Pilipinas.

Narito ang 10 mga bagay na hindi ko naiintindihan sa Pilipinas (in no particular order).

1. Bakit galit na galit ang mga militanteng aktibista?
Ano ang naitutulong sa mga Pilipino at sa Pilipinas ng pagsusunog nila ng effigy, ng nililikha nilang traffic at ikinakalat nilang basura sa kalsada? Binu-bully tayo ng Tsina pero bakit hindi sila nagsusunog ng bandera ng Tsina o kaya ng picture ni Mao Tse Tung?

2. Bakit yung mga sumusunod sa batas ang pinapahirapan?
Isang magandang idea parati ng mga ahensya ng gobyerno ang: dagdagan ang buwis ng mga empleyado, dagdagan ang binabayaran ng mga OFW, dagdagan ang bayaran ng mga kumukuha ng business permit, dagdagan ang bayad sa airport, etc.

Pero kung tama ba yung pagma-manage sa pera ng mga ahensyang ito eh hindi yata masyadong napag-aaralan. Gaya ng balitang ito: 250,000 OFWs deprived of Philhealth benefits

Lalo lang nitong ine-encourage ang mga tao na maghanap ng loophole at lumabag sa mga ipinapatupad na batas ng pamahalaan. Bakit ‘di muna nila ayusin yung umiiral na sistema bago magpataw ng bagong pagkakagastusan sa mga tao?

3. Bakit may mga nagbubuga pa rin ng maitim na usok na sasakyan?
Kahit merong mga smoke belching tests sa LTO, marami pa ring nagkalat na nagbubuga ng nakakalason na usok sa kalsada. Paano nakakapasa sa test ang mga sasakyang ito?

Tapos dadagdagan nila yung taon ng pag-aaral ng mga estudyante para daw maging competitive tayo. Eh linisin lang natin yung hangin natin eh baka mag-improve ang IQ nating lahat sa Pilipinas eh!

4. Bakit merong “For Registration” na plate number?
Kung yung mga plate number na ngang totoo eh napepeke, ‘yun pa kayang “For Registration”? Eh kahit sino kayang gumawa nun eh.

Hindi ba napakadaling makatakas ng kahit sinong nakagawa ng krimen kung “for registration” ang plate number ng gagamitin nilang sasakyan? Ipagbawal na dapat ang paggamit nito eh. Kung hindi pa registered ang sasakyan, hindi ito dapat gamitin sa kalsada.

5. Bakit gustung gusto nating ginagaya ang ibang bansa?
Yung palabas nila sa tv, yung pananamit nila, yung kanta nila etc., patok na patok sa atin at kinokopya pa natin. Mangongopya na rin lang tayo eh di kopyahin na rin natin yung mga ugali nilang nagiging dahilan ng pag-unlad ng bansa nila. Gaya ng pagsunod sa batas at mahigpit na pagpapatupad dito.

6. Bakit mayaman ang Intsik sa bansa natin?
Bakit si Henry Sy ang pinakamayamang tao sa Pilipinas at hindi si Manny Pangilinan? Bakit hindi Pilipino ang mayayaman sa Pilipinas? Filipino citizen na ba si Henry Sy? Pwede na rin ba tayong maging proud para sa kanya?

7. Bakit masyadong sensitive ang mga Pilipino?
Kahit alam nating may bahid ng katotohan, makikipag-away, makikipaglabasan ng baho, makikipag-debate tayo sa mga negative na sinasabi sa atin.

Pero kahit maipamukha natin sa ibang bansa na mas reject ang bansa nila, hindi nun nababago yung masamang kalagayan ng peace and order, ekonomiya, edukasyon, kalusugan, kalinisan, government service, at iba pa sa bansa natin. Nananatili pa rin yung katotohan na kailangan pa rin ng malawakang improvement sa bansa natin.

8. Bakit may mga problema ang bansa na hindi sinu-solusyunan?
20 years ago, binabaha na yung mga kalsada sa lugar namin. Hanggang ngayon, binabaha pa din! Kapag may buni ka ba sa balat, hahayaan mo lang ito mawala? Hindi ba gagamutin mo ito?

Pero bakit yung gun related violence, hoodlums in uniform, hazing, election violence, maruming inuming tubig, trahedya pag may bagyo, street children at child labor, tagas ng water pipes, sirang mga kalsada, illegal recruiters, mga napuputulan ng daliri ‘pag bagong taon, tinatamaan ng ligaw na bala, kidnapping, carnapping, inefficient garbage disposal system, etc., etc., etc., ay hindi pa rin nagagawan ng pangmatagalang solusyon?

Mga sakit ng lipunan ito na hindi ginagamot.

9. Bakit nagkalat ang mga baril sa isang bansang marami ang nagugutom?
Sa’n nakakakuha ng baril ang mga criminal elements ng lipunan natin? Mas madali na lang ba talaga makakuha ng baril at bala ngayon kesa makahanap ng marangal na trabaho?

10. Bakit may mga Pilipinong galit kunyari sa mga telenovela?
Mumurahin pa nila at lalait-laitin ang mga writer at artista ng telenovela. Isusumpa nila sa kaitaas-taasang langit ang telenovela pero maaasahan mong araw-araw pa rin nila itong susundan at hindi palalagpasin para malaman kung ano ang mga susunod na pangyayari.

Nakaka-high blood. Pwede ba akong sumigaw?

sigaw ng galit

Okay na ‘ko…meron pa pala.

11. Bakit may mga Pilipinong hindi nagre-reklamo sa awtoridad?
Magrereklamo sila sa mga kaanak nila, kaibigan nila, sa mga ka-text nila, mga ka-facebook nila o kaya sa…blog nila! Pero hindi sila magrereklamo dun sa mga merong pwedeng magawa. Hay naku!

Ekonomiya ng Pilipinas Gumaganda?

Nabasa ko ito sa Inquirer. Isa na namang pambuhay ng loob.

In an interview with Philippine media, Tadashi Yanai said that while the global economy is sluggish, “in countries like the Philippines, the situation is very good. Asia, for the first time, has the momentum in terms of development. There’s a huge potential.”

Kelan kaya mararamdaman ng mga Pilipino ang magandang ekonomiya na laging binabanggit sa media? Parang si Henry Sy lang ang nakakaramdam nito eh.

Narito ang buong istorya: Japan’s Richest Man is Upbeat About PH