Gusto mo bang maging OFW? Okay lang yun, wag ka lang mag-TNT.
Marami na akong nabasa at narinig na istorya ng mga TNT (Tago Ng Tago) na OFW. May mga nakilala na rin akong mga TNT sa bansang kinaroroonan ko. Kung mahirap ang buhay ng ilang mga OFW, lalong mahirap ang buhay ng overstaying o undocumented OFW.
Heto ang ilang mga dahilan kung bakit hindi ka dapat mag-TNT sa ibang bansa.
1. Perwisyo ito sa sarili, sa imahe ng mga Pilipino at imahe ng buong Pilipinas
Naghihigpit ang maraming bansa sa pagtanggap ng mga Pilipinong trabahante dahil sa mga kaso ng overstaying o illegal staying na mga Pilipino. Nagiging pangkaraniwan tuloy sa mga dayuhan ang pananaw na marami sa mga Pilipinong nangingibang bansa ay gustong manatili ng illegal sa kanilang bansa.
Gawa nito, lalong nahihirapan ang marami sa ating mga kababayan na makapunta sa ibang bansa. Kahit mamasyal lang, nire-require ng maraming bansa (lalo na yung mga 1st world) na kumuha ng visa ang mga Pilipinong turista.
2. Efficient ang mayayamang bansa sa pagtugis sa mga TNT, matatagpuan ka nila
Kung mayaman ang bansa kung saan gusto mong mag-TNT, malamang ay magaling ang sistema ng kanilang pamahalaan sa paghahanap ng mga overstaying foreigners. Hindi ka makakapagtago ng matagal. At pag natagpuan ka nila ay ipapatupad nila ang full force ng batas sa iyo.
Sa Japan, may isang kaso ng overstaying Filipino couple na 17 taon nanatili ng illegal subalit natukoy pa rin sila at dineport ng mga awtoridad.
3. Kapag nahuli ka, mababa-blacklist ka at mahihirapang makapunta sa ibang bansa
Isa sa mga masaklap na parusa sa mga nahuling overstaying Filipino ay ang risk na ma-ban din sa iba pang mga foreign countries. Lalo n’yang pinapahirap ang kanyang sitwasyon dahil patatalsikin na s’ya sa bansang kinaroroonan n’ya, mawawalan pa ng tiwala ang ibang bansa na tanggapin s’ya dahil sa posibilidad na ulitin n’ya ang overstaying pagkapasok sa ibang bansa.
4. Parati kang may agam-agam at hindi makakilos ng malaya sa bansang kinaroroonan
Ang mga TNT ay laging nag-aalala sa kanilang kalagayan. Pigil lagi ang pagkilos at nililimitahan ang mga activities. Hindi ka makakapunta sa mga mataong lugar dahil matatakot kang may makadiskubre na overstaying ka. Takot kang gumawa ng anumang transaction na maaaring magsiwalat na illegal ang iyong pananatili sa bansa.
Meron akong na-meet na TNT dati na takot na takot lumabas o magpunta sa mga mataong lugar. Nag-lapse na ang kanyang tourist visa at natatakot siyang matagpuan ng mga awtoridad. Sa huli, natakot na rin ang kumukupkop sa kanya dahil baka pati ito ay maparusahan kapag nalaman ng mga awtoridad na sa kanila nakatira ang TNT na Pilipino.
Hindi ko na alam kung nasaan ang TNT na ito ngayon.
5. Madali ka lang i-blackmail ng iyong makaka-away sa bansang kinaroroonan
Kapag may naka-away ka o nagkaroon ng hindi pagkakaintindihan sa isang taong nakaka-alam na overstaying ka, hawak ka na n’ya sa leeg. Hindi mo magagawang umalma dahil takot ka na isusumbong ka ng taong ito sa mga awtoridad.
6. Wala kang karapatan sa anumang pribilehiyo
Mahirap mabuhay sa ibang bansa kung hindi ka maka-avail ng mga serbisyo na nangangailangan ng ID. Di ka makakuha ng celphone, di ka makapag-maneho, di ka makagawa ng video rental card, di ka makapagpa-admit sa ospital, at kung anu-ano pa. Liban lang kung merong mga tutulong sa ‘yo para makuha ang mga bagay na ito. Sa legal man o illegal na paraan.
7. Mahirap maghabol sa sinumang maaaring mang-abuso sa iyo
Kapag inagrabyado ka sa ibang bansa; ninakawan ka, sinagasaan ka, binuhusan ka ng kumukulong mantika, o kahit nahulog ka lang mag-isa mula sa tinitirhan mong building eh mahirap humingi ng tulong sa mga awtoridad. Bago pa nila hulhin yung umalipusta sa ‘yo eh ikaw na muna ang ikakaloboso nila kapag nalamang TNT ka.
Mahirap ang buhay sa Pilipinas, kulang sa trabahong may disenteng pasahod, pataas ng pataas ang presyo ng mga bilihin, parami ng parami ang sinisingil ng gobyerno, at buhay na buhay pa rin ang marami sa mga walang kwentang corrupt government officials na nagnanakaw sa kabang-yaman natin.
Subalit hindi laging solusyon sa kahirapan ang mamuhay sa ibang bansa.
Gawing legal ang lahat ng dokumento. Gawing legal ang pananatili sa ibang bansa. Mahirap na ang buhay, huwag mo nang dagdagan ang pahirap sa sarili, huwag kang mag-TNT.
Related Articles:
pag TNT po ba matutulongan parin po ba ng ating gobyerno
Hellow ako edelyn muring nandito ako dubai .. Tumakas ako amo kasi poh DH po ako Hindi kaya trabaho poh. Naging tnt po ako sa bansa ito . Kaso wala aking passport ko visa hawak Amo ko. Id lang po hawak ko resident ako dito dubai ano po pwide gawin ko. Bago ako tumakas amo isang buwan pa lang po ano pwide gawin sana matulongan ninyo ako.
mas mainam po kung makakahingi kayo ng tulong sa mga malapit ninyong kaibigan o kamag-anak na nandyan sa dubai. subukan din po ninyong magpunta sa philippine embassy.
Hello po, tanong kulang sana. Paano po ako makakahingi nang tulong para sa tito ko na nasa Malaysia. Almost 35 years napo siya doon. Naloko kasi sila nang employer niya na nagdala sa kanya. Wala silang papeles na legal yung pagpunta nila. Hindi po nakatapos nang elementary ang tito ko kaya wala siyang alam kung paano at ano ang gagawin noong mga panahong yon. Nakulong siya doon nang ilang taon. Akala naming patay na. pero ngayon nagkaroon kami nang komunikasyon. Takot, lungkot hinagpis at hirap ang nakikita ko sa kanya. Sana po matulungan niyo ako nang process. Salamat po.
Hay poh,,ask kolang saang website ako pwedi makapagreport sa Embassy ng Korea. kasi may kamag anak akong nasa Korea at yung ka live in partner niya eh nasa Korea din,nagkaanak cla ng dalawa doon tapos yung isang anak nila na babae nandto sa pinas,,may plano clang pabalikin ang anak nilang isa sa Korea pero iba ang dadala at tatayong nanay ng bta kasi daw poh TNT cla doon.
mahirap makulong kaya nakakatakot….